АКШнын президенти Дональд Трамп ушул аптада күтүлүп жаткан орус президенти Владимир Путин менен жолугушуудагы башкы максаты Украинадагы согушту токтотуу экенин айтты. Бул тууралуу дүйшөмбү күнкү маалымат жыйынында билдирди. Трамптын айтымында, учурда согушуп жаткан эки өлкөнүн башчыларынын жолугушуусун уюштурууну көздөп жатат.
“Акыр-аягында мен аларды бир бөлмөгө киргизип, жолуктурам. Ал жерге мен катышышым мүмкүн, балким катышпайм. Бирок мен (жаңжалды) чечебиз деп ойлойм”, - деп билдирди.
Дональд Трамп 15-августка белгиленген Путин менен жолугушуу сыноо иретинде болорун кошумчалады. Кошмо Штаттардын лидери Украина менен Орусиянын ортосундагы арачылык аракеттерди токтотуп коюшу мүмкүн экенин четке каккан жок. Бирок Украинадагы согушту токтотуу үчүн жолугушууларды уюштуруп жатканын, анын жүрүшүндө айрым аймактарды алмашуу да болушу мүмкүндүгүн билдирди. Трамп бул келишим эки тарапка тең ыңгайлуу болушу керектигин тактады.
Буга чейин Владимир Зеленский Украина өз аймагын кимдир-бирөөнө бербей турганын билдирген эле.
АКШнын президенти Дональд Трамп менен Орусиянын президенти Владимир Путин 15-августта Альяскада жолугары кабарланган. Анда Украинадагы согушту токтотуу боюнча сүйлөшүү болору күтүлүүдө. АКШ жана Орусиянын лидерлеринин жолугушуусу тууралуу сөз өткөн аптада АКШнын атайын өкүлү Стив Уиткофф Москвага барып, Путин менен сүйлөшүүлөрдү өткөргөн соң айтылган.
Украина Орусиянын 70тен ашуун дрон чабуулунун мизин кайтарганын билдирди
Украинанын Аба күчтөрү 11-августта Орусия 71 дрон менен чабуул койгонун маалымдады.
12 аппарат алты локацияга тийгени, атып түшүрүлгөн дрон калдыктары дагы бир жайга кулаганы кабарланды.
Москваны бутага алган жети дрон атып түшүрүлдү
«Москваны көздөй учурулган дагы эки дрон атып түшүрүлдү», — деп мэр Сергей Собянин Телеграмга жазды.
Анын маалыматына караганда, түндөн баштап бүгүн, 11-августта жергиликтүү убакыт боюнча саат 9:35ке карай жок кылынган дрондор жетиге жетти. Согуш шартында Собяниндин маалыматынын чын-бышыгын тактоо мүмкүн эмес.
Саратов облусунун губернатору Роман Бусаргин дрондордун бири көп кабаттуу үйлөрдүн короосунда жарылып, бир киши мерт болуп, дагы бир нече тургун жараат алганын билдирди. Дагы бир ишканада жарылуу болуп, аба соккусунан улам өрт башталганы кабарланды. 11-августка караган түнү Нижний Новгород облусундагы мунай ишканасын бутага алган соккудан бир киши набыт болуп, эки киши жараат алганын жергиликтүү бийликтер ырасташты.
Ага удаа Украинадагы согуш башталгандан бери Коми республикасы алгачкы ирет дрондордун чабуулуна кабылды. Кабарларга караганда, аймактагы "Лукойл-Ухтанефтепереработка" ишканасын бутага алган дрондордун бири аймакка кулап, жакын жердеги соода борбору менен мунай ишканасынан адамдар эвакуацияланды. Ишкананын кызматкерлеринин бири Телеграм каналга мунай сакталган цистерналардын биринде жарака кетип, өндүрүшкө зыян келтирилгенин жазды.
Ухта шаарындагы аэропортто айрым каттамдар убактылуу токтотулду. Коми республикасы украин-орус чек арасынан эки миңдей чакырым алыстыкта жайгашкан. Буга чейин аскердик бутага алынган эмес. Республика жетекчилери адамдар арасында жабыркагандар болгон жок деп билдиришти.
Москванын мэри Сергей Собянин дүйшөмбүгө караган түнү кеминде беш дрон асманда атып түшүрүлгөнүн кабарлады. Орусиянын армиясынын Украинанын Запорожье облусундагы автовокзалга тийген соккусунан 20дан ашуун киши жарадар болуп, ооруканага жеткирилди.