Украинанын мамлекеттик "Хочу жить" долбоору 2025-жылдын алты айында Орусиянын Коргоо министрлиги менен келишим түзгөн 628 тажикстандыктын ысымын жарыялады. Долбоор апрелде Орусия согушка азгырган 931 тажик жаранынын тизмесин чыгарган. Анын кеминде 196сы каза болгонун жазган.
"Хочу жить" Орусия Тажикстандын жарандарын согушка тартуу аракетин күчөткөнүн белгиледи.
Тажик бийлиги бул маалыматтар тууралуу расмий комментарий бере элек.
Быйыл майда Орусиянын Тергөө комитетинин башчысы Александр Бастрыкин күч органдары орус паспортун алган 20 миң мигрантты "кармап", Украинага каршы согушка айдаганын билдирген.
"Хочу жить" мамлекеттик долбоору Украинанын Аскер туткундары боюнча маселелерди координациялоо штабына карайт. Долбоор Орусия тарапта согушкан аскерлерге, чет элдиктерге, Украинанын оккупацияланган аймактарынан мобилизация болгондорго украин тарапка коопсуз шартта колго түшүп берүүгө көмөктөшөт.
Буга чейин Борбор Азиянын башка мамлекеттеринен, анын ичинде Кыргызстандан согушка азгырылгандардын тизмелерин жарыялаган.
Украинанын дрондору 19-августка караган түнү Орусиянын Волгоград облусундагы мунайды кайра иштетүүчү заводго сокку уруп, өрт чыкканын, аны эртең менен гана өчүрүүгө мүмкүн болгонун "Интерфакс" жергиликтүү бийликке таянуу менен билдирди.
Чабуулдун кесепеттери айтылган жок.
Ушуну менен бул завод 13-августтан бери кеминде үчүнчү жолу дрондордун бутасына алынды.
Украина завод орус армиясын күйүүчү май менен камсыз кылгандыктан, аскердик объект болуп эсептелерин билдирген.
Согушка чейин ишкана жылына 15 млн тоннадай мунай өндүрчү, бул Орусиядагы жалпы мунай өндүрүшүнүн 5.5% жакынын тузөт. Учкучсуз аппараттар аны 2024-жылдын февралынан бери бутага алып келүүдө.
Волгоград облусунун бийлиги билдиргендей, түндө атып түшүрүлгөн дрондордун биринин сыныгы шаардын түштүгүндөгү №16 оорукананын аймагына түшүп, анын корпустарынын биринин чатыры өрттөнүп кетти. Жабыркагандар жок деп кабарланды.
Орусиянын Коргоо министрлиги бүгүн эртең мененки маалыматында Волгоград жана Ростов облустарынын, аннексияланган Крымдын үстүндө 23 украин дронун жок кылганын жарыялады. Жалпы канча дрон менен чабуул коюлганын тактаган жок.
Украинанын аба күчтөрүнүн маалыматына караганда, 19-августка караган түнү орус аскерлери дрон, ракеталар менен Полтава облусуна жапырт чабуул койду.
Облустук аскердик администрациясынын башчысы Владимир Когут билдиргендей, атып түшүрүлгөн дрондордун калдыктары Кременчуг жана Лубенск райондорунда кулады. Энергетикалык ишканалардын имараттары жабыркаган.
Соккунун кесепетинен Лубенск районунда 1471 үй, 119 объект жарыксыз калды.
Кременчугдун мэри Виталий Малецкий Telegram каналына Украинанын президенти Владимир Зеленский менен АКШнын президенти Дональд Трамптын сүйлөшүүлөрү учурунда орус армиясы «Кременчугга кезектеги жапырт чабуул койду» деп жазды.
«Шаарда ондогон жардыруулар болду, орус армиясы энергетикалык жана транспорттук инфраструктураны бутага алды», - деди ал.
18-августта Вашингтондо Зеленский менен Трамп жолугушкан. Ага удаа эле Трамп менен Зеленский Вашингтонго барган европалык лидерлер менен сүйлөшкөн.
Ак үйдөгү жолугушуу учурунда Украинага коопсуздук кепилдигин берүү согушту токтотуу планынын бир бөлүгү катары каралганын Дональд Трамп билдирди. Анын айтымында, мындай кепилдикти Европа өлкөлөрү АКШ менен чогуу координациялап бериши керек.
Axios басылмасы өз булактарына таянып, Трамп Украина жана Орусиянын лидерлеринин жолугушуусун августтун аягына чейин уюштурууну көздөп жатканын жазды.
Ак үйдөгү жолугушуудан кийин маалымат жыйынында украин президенти Зеленский Украинанын коопсуздугуна кепил болчу өлкөлөрдүн катарына кошулууга АКШ да даяр экени жөнүндө Трамптын “ачык ишараты” болгонун айтты. Ал коопсуздук кепилдигинин алкагында Европа өлкөлөрү Украинага АКШдан 90 миллиард долларга бааланган курал-жарак сатып алуу талкууланып жатканын кошумчалады.
АКШнын президенти Дональд Трамп Вашингтондо Украинанын президенти Влдаимир Зеленский жана бир катар европалык лидерлер менне жолуккан соң Орусиянын президенти Владимир Путин менен телефон аркылуу сүйлөштү. Трамптын маалыматы боюнча, ал сүйлөшүүдө Зеленский менен Путиндин тикелей жолугушуусун уюштуруу жөнүндө сөз болду. Дал ушул жолугушуудан соң Украина, Орусия жана Кошмо Штаттардын лидерлери катышкан үч тараптуу кездешүү өтүшү мүмкүн.
Путиндин жардамчысы Юрий Ушаков Трамп Путинге телефон чалганын ырастады. Ал эки президент Украина менен Орусиянын ортосундагы сүйлөшүүгө катышчу делегациянын деңгээлин көтөрүү тууралуу сөз болгонун кабарлады. Бирок кийинки сүйлөшүүгө Зеленский менен Путин катышарын тактаган жок. Буга чейин Стамбулда өткөн украин-орус сүйлөшүүлөрүндө делегацияларды Украинанын Улуттук коопсуздук кеңешинин башчысы жана орус президентинин кеңешчиси жетектеген эле.
18-августтагы Ак үйдөгү жолугушуу учурунда Украинага коопсуздук кепилдигин берүү согушту токтотуу планынын бир бөлүгү катары каралганын Дональд Трамп билдирди. Анын айтымында, мындай кепилдикти Европа өлкөлөрү АКШ менен чогуу координациялап бериши керек.
Axios басылмасы өз булактарына таянып, Трамп Украина жана Орусиянын лидерлеринин жолугушуусун августтун аягына чейин уюштурууну көздөп жатканын жазды.
Ак үйдөгү жолугушуудан кийин маалымат жыйынында украин президенти Зеленский Украинанын коопсуздугуна кепил болчу өлкөлөрдүн катарына кошулууга АКШ да даяр экени жөнүндө Трамптын “ачык ишараты” болгонун билдирди. Ал коопсуздук кепилдигинин алкагында Европа өлкөлөрү Украинага АКШдан 90 миллиард долларга бааланган курал-жарак сатып алуу жөнүндө талкууланып жатканын кошумчалады.
Маалымат жыйында Франциянын президенти Эммануэл Макрон орус бийлиги Украинадагы согушту тынч жол менен жөнгө салууга даяр экенин күмөн санарын айтты. Француз лидери: “Путин тынчтыкты кааларынан күмөнүм бар. Анын башкы максаты Украинанын көбүрөөк аймагын басып алып, бул өлкөнү алсыздандыруу деп ойлойм”, - деди ал.
18-августта Ак үйдө АКШнын президенти Дональд Трамп менен Украинанын президенти Владимир Зеленскийдин жолугушуусу өттү. Бул жолугушуудан соң украин президентине колдоо көрсөтүп, Еврокомиссиянын төрайымы Урсула фон дер Ляйен, Франциянын президенти Эммануэл Макрон, Финляндиянын президенти Александр Стубб, Германиянын канцлери Фридрих Мерц, Британиянын премьер-министри Кир Стармер, Италиянын премьер-министри Жоржа Мелони жана НАТОнун баш катчысы Марк Рюттенин катышуусунда Украинадагы согушту токтотууга арналган сүйлөшүү өттү.